Пакістан гатовы спыніць ваенны канфлікт з Індыяй, калі Нью-Дэлі таксама пагодзіцца на гэта. Такую заяву зрабіў міністр абароны ісламскай рэспублікі Хаваджа Асіф у інтэрв'ю Bloomberg TV.
«Цягам апошніх двух тыдняў мы ўвесь час заяўлялі, што ніколі не пачнём варожых дзеянняў у дачыненні да Індыі. Але калі на нас нападуць, мы адкажам. Калі Індыя адступіць, мы, безумоўна, пакладзём канец гэтай напружанасці», — сказаў Асіф.
Нагадаем, у ноч на 7 траўня Індыя ў адказ на расстрэл турыстаў у Кашміры нанесла ракетныя ўдары па некалькіх цэлях у Пакістане. Пакістан заявіў, што ў адказ збіў пяць індыйскіх знішчальнікаў і знішчыў штаб армейскай брыгады.
Як перадае раніцай 7 траўня агенцтва Reuters са спасылкай на прэс-сакратара Узброеных сіл Пакістана, у выніку ўдараў ВПС Індыі па Пакістане загінулі 26 чалавек, яшчэ 46 атрымалі раненні.
