Праз два з паловай гады пасля пратэстаў палітычныя звальненні і не думаюць заканчвацца. Больш за дзясятак супрацоўнікаў «Ашмянскіх электрычных сетак» (філіяла «Гроднаэнерга») працуюць апошні месяц і сыходзяць з 1 траўня. Пра гэта «Люстэрку» расказалі некалькі не звязаных паміж сабой крыніц. У спісе на звальненне — людзі з дзесяцігадовым стажам, мінімум адзін начальнік аддзела, інжынеры і не толькі.
Інфармацыя пра колькасць тых, каго звальняюць, у нашых суразмоўцаў розная: ад 15 да 30 чалавек. Але ўсе кажуць, што на першым спісе адыход супрацоўнікаў не скончыцца. Паводле нашых суразмоўцаў, імаверна, запланавалі звольніць больш за 50 чалавек.
— На гэты момант вядома недзе пра 20 чалавек, якія дапрацоўваюць да 1 траўня. Некаторыя са стажам больш за 30 гадоў, — расказаў нам супрацоўнік прадпрыемства. — Прычына? З таго, што я ведаю, усе гэтыя людзі ўдзельнічалі ў той ці іншай ступені ў мітынгах 2020 года. Але візітаў органаў да нас яшчэ не было. Кажуць, проста прыйшла папера са спісам на звальненне, адкуль менавіта — не ведаю.
Яшчэ адна чытачка «Люстэрка», добра знаёмая з сітуацыяй на прадпрыемстве, расказвае, што ў спісах на звальненне многія — рэдкія спецыялісты, якіх будзе складана замяніць. Паводле нашай інфармацыі, з прадпрыемства сыдуць начальнік аднаго з аддзелаў, кіраўнік лабараторыі, бухгалтар, а таксама шэраг інжынераў.
— Цяпер звальняюць не толькі тых, хто быў актыўны і хадзіў на пратэсты: напрыклад, адна жанчына лайкнула матэрыял пра кавід у красавіку 2020 года на адным з «экстрэмісцкіх» рэсурсаў, — расказвае суразмоўніца. — Іншаму супрацоўніку, які займаецца арганізацыяй святаў у калектыве, сказалі: «Ты правядзеш мерапрыемства ў верасні, тады мы цябе звольнім». Але дзяўчыну, якая выйшла на мітынгі, пакуль не звольнілі. Яна думае, што будзе ў наступным спісе.
На самім прадпрыемстве «Ашмянскія электрасеткі» магчымыя будучыя звальненні блогу «Людзі» пракаментаваў дырэктар філіяла Ігар Удалой. Атрымалася вельмі каротка.
— Нам паведамілі чытачы, што на прадпрыемстве «Ашмянскія электрычныя сеткі» масавыя звальненні, шэраг супрацоўнікаў працуе толькі да 1 траўня. Вы маглі б пракаментаваць, ці так гэта, ці сапраўды звальняюць людзей?
— Не, гэта не так.
— То-бок спісу з дзясяткаў людзей, якіх нібыта звальняюць па палітычных матывах і ў якім у тым ліку начальнік аддзела, няма? І людзі не сыходзяць?
— Я вам адказаў, усё.
Пасля ўдакладняльнага пытання: «Значыць, усе супрацоўнікі працягнуць працаваць?» — ён кінуў трубку.
Чытайце таксама
